Fotos van die naweek

Al was die rede vir die kuier 'n hartseer ene (sien inskrywing net voor die ene), was dit nogtans lekker om die familie te sien :-) Ons het so lekker gekuier, dat ek op die end baie minder fotos geneem het as wat ek gedink het ek het!

By die begrafnis-tee. Ons klein drool-machine :-)

Jaag my Lee-Anne! Besig met 'n kruipkompetisie

Die tee was in die dorpsaal gehou met die pragtigste verhoog. Franco en sy kleinnefie en -niggie het alte gou die gordyn ontdek en hope pret gehad! Die helder kinderlaggies was salwend op 'n seer gemoed. Die kleertjies was maar goed stowwerig, maar gelukkig maak Omo weer alles silwerskoon.

Soms was Meneertjie so haastig, hy het skoon geski op die verhoog


Waar's hy? Daar's hy! Graeme is Lee-Anne se ouboet en was wonderlik met die kleintjies

'n Poging tot 'n groepsfoto van die kleinnefies en -niggie. Van links na regs:

is 'n onwillige Lee-Anne (3 in Oktober), Graeme (9 jaar), Hannelize met Fouche (8 maande - tannie Sandy se skoondogter en enigste kleinkind) en Gert met Franco

Fouche verwonder hom aan Graeme wat as kwaai Ouboet vir Lee-Anne tot orde probeer bring en Franco oefen sy waai-tegniek. (Hy het agter gekom dit lok groot reaksie uit, en vir 'n paar dae was dit die nuutste thing om oor-en-oor te doen)

Probeerslag nommer twee. Lee-Anne is erens 'n pienk spikkel agter die gordyn

Fouche is 'n klein bulletjie, en is langer en swaarder as ons klein Aspatatie al is daar 3 maande verskil tussen die twee. Franco is duidelik my en Gert se kind! Reuse is ons nie :-)

Saam met Ouma en Oupa

Baie vroeg Sondag-oggend toe ons wou ry, besef ek skielik ons het so lekker gekuier dat ons nooit 'n foto van Franco saam met Ouma Elna en Oupa Lappies geneem nie! Skuus ons vang julle so in jul nagklere - maar 'n foto moes ons darem he!

Die afry deur die middag/aand was nie so sleg nie, en Franco was droomsoet (en groot dele in droomland!) - maar toe ons so kort na Donderdag weer die langpad aandurf was Boeta minder ingenome. Ons het maar kort-kort gestop en allerhande interessante plekke ontdek. Dink hierdie was by Kroonvaal.

Oom Hannes hou piekniek, en Franco toets die swaaie uit

Die piekniekmandjie het kersietamaties opgelewer, en ons wou kyk wat Franco daarmee maak. Soos verwag, gaan die nuwe fonds glad nie mond toe nie maar die handjies het als ywerig ondersoek.

Hmmm - wat is die? Kom ons slaan/druk dit dood! .

Na die eerste tamatietjie oopgebars is (en Gert lekker nat gesquirt is!), het Franco gedink dis 'n lekker speletjie en wou net nog en nog tamaties he. :-)

'n Nabyskoot van die gemors. Dankie tog vir afveedoekies!

Nog 'n tamatie seblief Mamma? Maar Pappa se NEE ;-)

Dis lekker besig by die werk - ons is altyd besig die tyd van die jaar, en April se baie vakansiedae is lekker, maar die deadlines skuif nie aan nie. :-)

Verder beplan ons lekker aan Franco se verjaarsdag-partytjie. Dis al Maandag! Gits! En behalwe vir almal uitnooi, het ek nog niks eintlik voorberei nie. Sal maar die naweek rondhardloop - en baie dankbaar wees vir Ouma Miekie wat wil help! Die verjaarsdag is eintlik eers die 23ste, maar ons hou dan bietjie vakansie (yeah!) en omdat Franco se ander Ouma en Oupa nou by ons sou kom kuier het, het ons die partytjie bietjie vroeer gemaak sodat hulle ook kon by wees. Maar nou ja, die Here het ander planne gehad en hulle help nou eers dinge in Middelburg uitsorteer.

Op 'n ander punt - is die Here se skeppingswerk nie ongelooflik nie? Minder as 'n jaar terug was Franco nog 'n pap babatjie wat nie eers kon glimlag nie (maar nogtans diep in ons harte gekruip het!). Deesdae is pure klein seuntjie wat al saam met maatjies kan saamspeel en saamlag! Noudat ek 'n mamma is, dink ek, ek verstaan effens beter van hoe lekker dit vir die Here moet wees as Hy sien hoe ons groei en ontwikkel (en hoe gefurstreerd Hy moet raak as ons deur ongehoorsaamheid daai ontwikkeling verlangsaam). En tog gee Hy nooit moed op met Sy kinders nie. Dankie Here! Vir U liefde, sorg en geduld. Dankie vir die blessing wat Franco is, en dat ek deur hom soveel lesse van U kan leer. Maak my hart sag en ontvanklik vir U stem, sodat daai lesse nooit verniet sal wees nie..

Familie Kersfees-fotos

Nota: Ek het gister begin om te skryf oor Franco se eerste Kersfees, en agtergekom dit vat lank. :-) Het toe maar intussen die familie-fototjies opgesit. Toe ek vandag die Kersfees inskrywing klaarmaak, toe publiseer Blogger dit onder die inskrywing!

Dis bietjie laat, maar: Geseende Kersfees! Hoop die Christus fees was 'n wonderlike spesiale dag deurdrenk met vrede en liefde.

Kers-oggend na kerk het ons gou aangetree vir die fotosessie

Ons gesinnetjie van 3. Mamma vertel ek was 'n wikkelkous wat geweier het om te sit, en eintlik net my bottel wou he :-) Nou vir wat neem hulle fotos as hulle weet ek is honger?

Wat kyk jy so? Het jy nog nooit 'n baba sien bottel drink nie?

'n Bottie maak sommer baie dinge reg in die lewe! Saam met Oupa Lappies en Ouma Elna

Ons manne was almal (onbepland) in blou. Het jy al 4 sulke mooi paar blou kykers bymekaar gesien? Mamma hoop my ogies bly blou nes my Pappa s'nne. (Maar ek is seker sy sal vir my lief bly maak nie saak watter kleur my ogies opeindig nie)

Ons 3 FJ's. Oom Frans Johannes, Oupa Frans Johan en ekke (Franco Jean).

Ekke kon nie ook 'n Frans wees nie - netnou het Oom Hannes eendag 'n seuntjie wat hy Frans wil noem! En moenie vergeet van my ander oom Frans wat met tannie Thelwyn getroud is nie. Dalk het hulle ook eendag 'n seuntjie wat lyk soos 'n Frans!

8 maande en dae oud

Raai wie is terug? :-)

Ons is pas terug van 'n heerlike maar woeste rondomtalie kuiery! Eers het ons vir 'n week op die plaas gebly sodat Ouma Miekie vir Franco kon oppas (want sy skooltjie het toe reeds gesluit). Franco het 'n wonderlike tyd gehad by sy Ouma en Martelize, en Mamma kon nog 'n week werk en sodoende verlof spaar vir as kleinman dalk sou siek word. Dankie Ouma Miekie! Jy is 'n ware ster en ons waardeer jou SO SO baie! Lees meer oor Franco se tyd by Ouma op haar blog - hier en hier

Ouma-hulle is die Vrydag al troue toe, en toe het ek saam met Mamma kantoor toe gegaan vir haar laaste dag. Ek weet nie hoekom kla sy so oor werk nie? Kyk hoe lekker speel mens dan in haar kantoor!

Na die kuier op die plaas het ons een slapie by die huis gehad om wasgoed te was, te pak en skoon te maak en toe is dit af Vrystaat toe vir my neef Niel se troue met die mooie Marissa. Die troue was baie spesiaal, en dit was so mooi om 'n getuie te kon wees van hoe twee Koningskinders hulle opnuut aan die Here en aan mekaar toewy. (Elke troue wat ek bywoon bring weer sulke helder herinderinge terug van ons groot dag. Die opwinding van daai dag, en hoe min ons geweet het - the best is yet to come! Ek en Gert het soveel pret as getroudes en dit gee my hoendervleis as ek dink wat als vir Niel-hulle voorle). Ek was maar lui met die kamera tydens die trou-naweek, maar die getroue Ouma was op haar pos!

Een van die min troue fototjies. Pa spot ek sit op Mamma se plek! :-)

Na die Vrystaat kuiertjie het ons die pad gevat na Ouma Elna en Oupa Lappies se huis in die klein Karoo. Daar is so baie nuus om te vertelle van ons kuiertjie daar, dat ek maar so stuk-stuk sal moet opvang!

Raai wie is 7 maande oud? En wat 'n woeste dag!

Sewe maande oud!

Sjoe - ons is al in die tweede helfte van sy eerste jaar! Kan skaars glo die tyd glip so vinnig verby...

Boetman jy word sommer nou vinnig groot! Jy sit, jy wurm-kruip, jy hou al 'n bekertjie vas en jy is sommer net jy! Een bondel non-stop baba-dinamo wat altyd aan die gang is. Jy speel jou ouers stokflou! (Maar ons sou dit nie anders wou gehad het nie)

Die skool vertel vir my jy hou nou al selfs jou bottels vas - dit wil Mamma nog sien, want by die huis sal jy klomp dinge vashou maar wil nog soos 'n wafferse prinsie gevoed word. Maar dis maar reg so Seuna - jy word nou so vinnig groot, Mamma geniet nog hierdie gentle reminders dat jy darem nog haar babatjie is.

Vroeg Saterdag-oggend en ons is besig om op die bal te hop! (Ek lyk net bietjie flou na die vorige nag se partytjie)

Ek word 'n groot seuntjie! Pa en Seun Saterdag in Oom Hannes se woonstel

Ek kan nog 'n opstel skryf oor hoe oulik Franco is, maar ons dag het skielik 'n ander wending ingeslaan toe ons na kerk agterkom die geyser het gebars en die spaarkamer is onder water. :-(

Franco was besig om op sy speelmat te speel toe Gert die "wonderlike" ontdekking gemaak het. Toe die chaos begin, het hy op sy magie omgerol en ons bekyk. Die klein klitsie het homself gebreek vir sy ouers wat rondskarrel met emmers en nat goed uitdra. Die lyfie het skoon geskud van die lag elke keer wat ons daar verby gehardloop kom. :-)

Dit was omtrent 'n deurmekaar res van die dag van sukkel met nat beddegoed, emmers wat die wereld rondstaan en loodgieter stories. Ek en Gert is albei stokflou om die minste te se. Ek is baie dankbaar dit het die week gebeur, en nie laasweek toe Franco siek en Gert weg vir werk was nie!

Ons was te besig om van die geyser chaos fotos te neem, maar ons het darem van Franco se eerste swem geneem!

(My ouers het by ons kom eet, en terwyl Gert loodgieters uitgesorteer het, het ek, Ouma Miekie en Franco bietjie in die swembad afgekoel)

'n Stokflou seuntjie modelleer sy hoed wat Ouma Elna spesiaal vir hom gemaak het! Dankie Ouma!

Lee-Anne word twee jaar oud!

Saterdag-aand was dit Franco se kleinniggie se tweede verjaarsdag. Lee-Anne is die jongste kind van Peter en Onja. (Onja is Gert se niggie aan vaderskant). Ek leer baie "tricks of the trade" by Onja, en ons is maar te dankbaar vir al die hand me down speelgoed en klere!

Lee-Anne is een skattige bondeltjie energie wat haar verjaarsdag vreeslik geniet het.

Die verjaarsdagmeisie (Die pleister op die arm is omdat sy haar knie gestamp het, maar op 'n pleister op haar ARM aangedring het om die eina beter te maak)

Geskenke oopmaak is soveel lekkerder as mens die papier maar kan skeur! (En na die tyd speel hulle lekkerder met die papier en bokse as met die eintlike persente ne)

Franco wonder waaroor die bohaai gaan. (Toemaar Boeta, een van die dae is dit Kersfees en dan sal jy gou-gou leer van die wonder van persente!)

6 maande, 2 weke

Raai waar was ons? En raai saam met wie?

Gert moes 'n paar dae verlof neem voor einde Oktober anders sou hy dit verbeur. Ek het toe ook verlof ingesit, en ons het toe vir Oupa Frans en Ouma Elna genooi om by ons te kom kuier! Die sterre van 'n oupa en ouma het al die pad met die bus gekom!

Hannes het toe ook verlof ingesit, en ons Dieretuin uitstappie kom meemaak. (Na Sandvlooi se vertelling was ons ook lus om te gaan) Groot pret! Veral toe tannie Thelwyn en Martelize ook nog saamgekom het!

Die uitstappie het wonderlik afgeloop, ten spyte van die warm son. Franco is nog bietjie klein, maar het wel van die diere (flaminke! apies! papegaaie!) wat die regte hoogte was en genoeg beweeg het groot-oog aangestaar. Te cute vir woorde!

Ons prossesie met die twee babawaentjies het natuurlik ook heelwat aandag getrek. Gelukkig was altwee babas stroopsoet, en kon ons te lekker met hulle spog! (En nee - ek en Thelwyn is nie 'n tweeling nie. En die enderste kleur T-hemde was nie beplan nie!)

Sonblok aan en hoedens op die kop! Oupa Frans, Ouma Elna met Franco, Dorette (Franco kyk net flaminke) Gert en Franco kyk vir die apies Thelwyn met Martelize

Doekparade in die buitelug!

Dis lekker in die Dieretuin! Oom Hannes en Franco

Martelize is min beindruk nadat Franco haar rateltjie gesteel het.

(Sussie, jy moet maar vinnig grootword - anders gaan hierdie nefie van jou al jou speelgoed steel. Sy mamma kan nie altyd gou genoeg keer nie, so jy moet hom maar beginne vasvat hoor!)

Twee ewe groot apies! :-)

Martelize was nog 'n bietjie lugtig, maar ander apie was vreeslik ingenome met Martelize! Hy het omtrent haar voetjies en hande teen syne gemeet en probeer uitmaak wie is die grootste. Hy dink seker ook sy is die pragtigste dingetjie!

Wie lyk die moegste? Ouma Elna, Oupa Frans en Franco

Stokflou geloop na 'n lang dag. Oupa en kleinseun, Gert, Hannes en Thelwyn

Dit was so spesiaal om hierdie "eerste" met Franco se ander Oupa en Ouma te kon gedeel het. Hulle bly gans te ver, en die paar keer 'n jaar is heeltemal te min! Telefoonkuiers is mos maar nie dieselfde as die ware Jakob nie. Dis altyd super lekker om hulle hier te he. :-)

6 maande, 1 week

Curriebeker senuwees!

Franco het gister sy eerste Curriebeker eindstryd beleef! Oupa Jan (en die res van ons!) geniet nogals sy rugby, en gister het ons gister het ons op die plaas gaan kuier om saam met Oupa ons span te ondersteun. Ongelukkig het die Blou Bulle 9 - 14 teen die Sharks verloor, maar dit was nogsteeds 'n lekker dag en kuier!

Oupa Jan en sy Bulletjie (Kyk Franco se rugbyballetjie!)

Aww, aww! Die spanning is eens te erg...

Sjoe! Uiteindelik verby! Ons klein drool machine :-)

6 maande, 3 dae

Die inval van die geel...

Na so baie van siek wees, het die plaas se mense darem vreeslik verlang na die klein prinsie! Ons het vanmiddag daar gaan kuier, en dit was 'n full house met al 3 ons kinders, 2 skoonseuns en 2 kleinkinders almal daar!

Franco in sy safari uitrusting. Kyk, die leeus op my foppie pas by die op my pakkie!

Ouma Miekie, Franco en Martelize het almal toevallig geel klere aangehad vir die dag. Ons moes 'n fototjie neem (al lyk juffrou se fraaie rokkie witterig op die foto)

Oupas is soveel pret!

Franco reken hy het die jackpot gewen om langs so 'n mooi dametjie te kan posseer. Martelize oefen solank haar royal wave.

O wee! Dit gaan seker ook nog baie gebeur! Martelize besluit twee foppies is beter as een...

Franco weer wil ook sulke mooi haartjies he!

Ons kan darem maatjies ook wees!

Dankie Here dat ons almal al soveel beter is dat ons weer kon gaan kuier. Dankie vir familie wat almal ook lief is vir ons Seuna! En dankie dat Franco 'n grootword niggietjie kan he. Ek bid dat hulle nog sommer groot maats sal word, wat vir mekaar tot seen sal wees. Jesus, U is so goed vir ons! Ek loof U naam!

Franco 5 1/2 maande, Martelize 10 1/2 weke

Oom Hannes het kom kuier!

Hannes (Gert se broer) het Vrydag-aand bietjie kom inloer, en Franco nog wakker gekry!

'n Middag in die tuin

Gert werk slegs half-dag op Vrydae, en ek het bietjie vroeer geloop by die kantoor vandag. Ons het voordeel getrek uit die mooi weer, en ons eie impromtu mini-piekniek in ons tuintjie gehou!

My sittery vorder!

My voete is deesdae permanent in die lug

Die tuin het interessante speelgoed!

Mens kan dit selfs met jou voete vashou!

Mamma was ook daar

Pappa se baard is interessant

Is egter nie so seker van hierdie gras ding nie

5 1/2 maande