My eerste sippy cup!

Franco drink deesdae sy bottel, maar dit gaan maar baie langtand. Die klein meneertjie verdra slegs Pigeon botteltiete en slegs formulemelk in 'n bottel. Geen water of borsmelk uit 'n bottel vir hom nie! En moenie eers probeer om enige ander botteltiet as Pigeon te probeer nie - geen Nuk, Avent, Baby Club of enige iets anders werk vir die fynproewer nie.

Die klinieksuster wil graag he hy moet meer water drink, en die skooltjie is gretig dat Seuna sy eie bottel begin vashou, maar Franco doen dinge op sy manier en op sy tyd :-) Vanaand het ek op die ingewing van die oomblik besluit om die sippy cup nader te trek. Het die bekertjie eers net met water vol gemaak want ek was seker Boeta sou dit net rondswaai en als bemors sonder om iets te drink. Was ek verbaas toe hy nie net die bekertjie mooi vashou nie, maar ook so ewe 'n hele paar slukke water drink!

Wat is die speelding? Nes Ma gedink het, word die bekertjie met gutso rondgeswaai...

Maar ek het begin regkom toe Mamma my op haar skoot tel en help om reg te mik. Amper daar...

Sjoe Mamma! Ek weet jy wil op die blog spog oor hoe mooi ek die bekertjie vashou en selfs die water drink, maar die flash is bietjie erg!

As ek geweet het dit sou so goed afloop, sou ek vir Gert gewag het om huis toe te kom. Dis nogals 'n uitdaging om 'n wriemelende baba op die skoot te hou, te wys hoe werk die bekertjie en nog 'n kamera te hanteer! Maar fotos moes ons he :-)

6 1/2 maande