Speelgoedkaskanades!

Franco het 'n klomp nuwe speelgoed ontdek die week!

Dinsdag was dit 'n koerant wat mens kon frommel en skeur Wie loer hier uit? (Ek moes net keer - want Boeta wil als in sy mond druk!)

Die voetjies het gedeel in die pret

Woensdag was dit die tupperbakkie waarin die spaar foppie gehou word

Kyk al my ander speelgoed, maar ek wil eerder met die bakkie speel

Dis 'n anderste rateltjie die!

6 maande, 1 week

Raai wie bad nou in die groot bad?

Franco pas nog net-net in sy bababadjie, maar die beentjies skop-skop so dat als naderand sopnat is. So van die week af, is dit bad in die groot bad vir die klein prins!

Badtyd is vet pret!
Sal die tandjie beter voel as ek die handdoek kou?
Wat gaan daar aan?

(Mens moet deesdae jou storie ken as jy doek omruil en klere aantrek - Boeta is 'n wikkelwurm wat die wereld vol rol)

6 maande 5 dae

Curriebeker senuwees!

Franco het gister sy eerste Curriebeker eindstryd beleef! Oupa Jan (en die res van ons!) geniet nogals sy rugby, en gister het ons gister het ons op die plaas gaan kuier om saam met Oupa ons span te ondersteun. Ongelukkig het die Blou Bulle 9 - 14 teen die Sharks verloor, maar dit was nogsteeds 'n lekker dag en kuier!

Oupa Jan en sy Bulletjie (Kyk Franco se rugbyballetjie!)

Aww, aww! Die spanning is eens te erg...

Sjoe! Uiteindelik verby! Ons klein drool machine :-)

6 maande, 3 dae

Die ideale "teething toy"!

Ek,Thelwyn en my ma was gister by Karin se ooievaarstee. Karin en Thelwyn is ewe oud, en ons was vir 17 jaar lank bure gewees! Ek, Thelwyn en Hendrik en Karin en Adriaan het so saam-saam grootgeword. :-) Dit was so spesiaal om hierdie vreugdevolle afwagting na Marko se klein boetie met haar te kon deel.


Franco en Martelize was ook saam, en was albei die soetste, vriendelikste babatjies wat 'n mamma maar voor kan wens. (Dit moet seker die goeie gene wees!). Franco stoei al 'n rukkie met sy eerste tandjie (hopelik die keer regtig-egtig!) wat moet deurkom, en het besluit Martelize se hand is net die regte ding om aan te kou. (Gelukkig is daar nog nie 'n tandjie wat gesny het nie - anders sou sy verseker geprotesteer het!)

Mmm...sal ek my eie hand gebruik?

Kom ek probeer twee hande gelyk...nee...wil nie lekker werk nie..

Het hom katvis! Net die regte grootte, en niks seer nie!



Sheez! Al daai vroumense! Baby showers is harde werk vir 'n klein prinsie

Franco 6 maande 2 dae, Martelize 12 1/2 weke

6 Maande Oud!

Franco was Donderdag 'n halwe jaartjie oud! Wow! Oor nog 6 maande Boeta is jy al EEN!

Hierdie maand het goed beginne - ons roetine van skool, werk & huis het begin vlot, jy het jou bottie mooi begin drink en begin beter regkom met die vaste kossies.

Maar o wee - toe tref die groot siekte ons huisgesin. Eers jy, toe jy en Mamma en net toe ons twee begin beter word toe word Pappa siek! Hier was omtrent omgekrapte magies, loopneuse en gehoesery in die huis. Gelukkig het jy twee ervare oumas wat jou dom ouers kon bystaan met raad en daad (en baie bid!) oor hoe om jou gou-gou weer gesond te kry.

Toe jy eers weer gesond is, toe is die lewe 'n fees! Jy lag en giggel en gesels en is net so oulik - ons wil jou sommer opvreet! Jy het ewe skielik besluit dat jy 'n honger seuntjie is, en kossies is nou 'n groot deel van die dag vir jou. Die pap is verseker beter as die butternut en groenboontjies, perskes is ok en pere is een groot groot bederf. Jy klink nes 'n motorkar soos wat jy ontevrede geluidjies maak as ons te lank vat om weer te skep en die volgende mondvol te voer.

Boeta boet, Goggabie, Seuna, Franco-Frank, Pa se bieliebam en Ma se Hart-se-punt - ons is SO SO lief vir jou! Elke dag kan ons die Here nie genoeg prys vir die wonderwerkie wat JY is nie. Jy is so perfek geskape, en is so 'n vriendelike seuntjie - dis 'n voorreg om jou ouers te wees. Ek en Pappa bid gereeld dat ons aanhou by ons Pa sal leer om net nog beter ouers vir jou te wees, en jou hopelik eendag na Hom toe kan lei.

6 maande oud vandag!

Kyk hoe groot word ek!

Speelgoed is soveel pret!

En Franco se naweek by Ouma en Oupa?

Vir die wat eerder fototjies van Franco as ons wil sien :-)

Kyk bietjie hier wat het Ouma Miekie als geskryf oor sy naweek.

Groot Vyf!

Gert se werk het ons vir die naweek uitgenooi na 'n la di da lodge op 'n privaat wildresevaat. Ons is omtrent bederf met heerlike kos, uitstekende diens en wildbesigtigingsritte uit die boonste rakke! Ons het selfs al vyf van die Groot Vyf gesien!

Al nadeel? Franco was nie genooi nie, en moes die naweek by Ouma Miekie en Oupa Jan kuier. Ek weet hy kon nie vra vir meer toegewyde en liefdevolle oppassers nie, maar ek het my doodverlang, en kon Sondag nie vinnig genoeg by die plaas uitkom nie.

Aan die positiewe kant, het ek en Gert heerlik saamgekuier en pret gehad. (En ons eerste deurnag slaap in 6 maande se tyd was hemel op aarde!)

Afrika op sy mooiste
Daar is geen heinings om die lodge nie, en die wild het sommer naby naby kom wei
Saterdag-oggend net buite ons kamer

Sondag op pad huis toe.

Daai miershoop in die middel is eintlik die maanhaar van Koning Leeu. Belowe!
'n Renosterkalfie onder die wakende oog van sy ma. (Weet julle hoe het sulke gesigte my laat verlang na MY babatjie?)

Olifante was volop en pragtig

'n Buffel soek skadu

Luiperd se kind uit op jag! Slegs 'n entjie verder was 'n troppie ribbokke wat sy bekruip het. Die hoogtepunt van die naweek! (Sy wou nie haar move maak met ons in die omgewing nie, maar dit was vreeslik opwindend die ruk wat ons doodstil vir haar gewag het om op te spring)

Dankie Here vir so 'n spesiale bederf naweek! Dankie vir 'n Ouma en 'n Oupa wat lekker naby ons bly, en nog kans sien om 'n kleinseun 'n hele naweek lank te bederf met hul liefde. En Here Wow! U skepping is wondermooi!

Die inval van die geel...

Na so baie van siek wees, het die plaas se mense darem vreeslik verlang na die klein prinsie! Ons het vanmiddag daar gaan kuier, en dit was 'n full house met al 3 ons kinders, 2 skoonseuns en 2 kleinkinders almal daar!

Franco in sy safari uitrusting. Kyk, die leeus op my foppie pas by die op my pakkie!

Ouma Miekie, Franco en Martelize het almal toevallig geel klere aangehad vir die dag. Ons moes 'n fototjie neem (al lyk juffrou se fraaie rokkie witterig op die foto)

Oupas is soveel pret!

Franco reken hy het die jackpot gewen om langs so 'n mooi dametjie te kan posseer. Martelize oefen solank haar royal wave.

O wee! Dit gaan seker ook nog baie gebeur! Martelize besluit twee foppies is beter as een...

Franco weer wil ook sulke mooi haartjies he!

Ons kan darem maatjies ook wees!

Dankie Here dat ons almal al soveel beter is dat ons weer kon gaan kuier. Dankie vir familie wat almal ook lief is vir ons Seuna! En dankie dat Franco 'n grootword niggietjie kan he. Ek bid dat hulle nog sommer groot maats sal word, wat vir mekaar tot seen sal wees. Jesus, U is so goed vir ons! Ek loof U naam!

Franco 5 1/2 maande, Martelize 10 1/2 weke

Oom Hannes het kom kuier!

Hannes (Gert se broer) het Vrydag-aand bietjie kom inloer, en Franco nog wakker gekry!

'n Middag in die tuin

Gert werk slegs half-dag op Vrydae, en ek het bietjie vroeer geloop by die kantoor vandag. Ons het voordeel getrek uit die mooi weer, en ons eie impromtu mini-piekniek in ons tuintjie gehou!

My sittery vorder!

My voete is deesdae permanent in die lug

Die tuin het interessante speelgoed!

Mens kan dit selfs met jou voete vashou!

Mamma was ook daar

Pappa se baard is interessant

Is egter nie so seker van hierdie gras ding nie

5 1/2 maande

Twee handjies en twee voetjies om die Heer te dien

Franco het 'n hele swembadjie vol speelgoed - als deeglik nagevors vir hul opvoedkundige eienskappe, maar niks kom deesdae by twee handjies en twee voetjies nie. Liewe Jesus speelgoed bly maar die beste!

In die huis deel ons allles! :-)

Tot heellaas ook die kieme! Laasnaweek het ons te vroeg optimisties begin raak - duidelik was ons novices met die siekwees ding, en min het ons geweet wat wag....

Franco se maagkiem het Sondag die wyk geneem, en hy was Sondag-aand so vrolik ons dag ons is home safely! Sondag-nag het die toe-neus van alle toe-neuse vir Boeta getref, en Maandag-oggend toe word ek die ene koue koors wakker.

Ek het probeer dapper speel en werk toe gegaan (ons is vreeslik besig by die werk, en baie van die projekte staan al maande en wag vir my terugkeer van kraamverlof af, die eksterne konsultante kan nie aangaan sonder my insette nie ens ens). Elke geval, het Maandag so 2 uurtjies gehou en toe maar huis te gekom. Dinsdag-oggend het ek net 'n vergadering gaan bywoon en toe maar weer in die bed kom klim...

Gelukkig is dit nou skoolvakansie, en was Ouma Miekie 'n groot hulp! Sy het Maandag, Dinsdag EN Woensdag haar vakansie opgeoffer om na die prinsie te kyk sodat ek net kon slaap. Ook het sy vir my en Boeta Dinsdag dokter toe gevat (Franco se nuus was goed, maar ek was sommer die heelweek afgeboek en moes antibiotika kry). Dankie Ouma!

Franco is Donderdag terug skooltjie toe - net sodat hy van voor af kon begin opgooi. :-( Dus was ons Vrydag en Saterdag toe maar fisio toe om bietjie die slyme uit te stoom en uit te klop. Dit lyk darem of dit help - dis weereens Sondag-middag en dit lyk of dit beter gaan!

Ek hoes en proes nog soos 'n tweedehandse trekker, maar sal darem more kan gaan werk. Net jammer Gert het gister-oggend die ene koue koors wakker geword...

(As mens die koste van die dokter, fisio en medisyne ignoreer, kan so siekte nogals ekonomies raak. Dis nou al die tweede naweek in 'n ry wat ons uit die winkels wegbly en niks spandeer nie!)